SAMAÍN (26-27)

 

Y llegó Samaín al IES El Batán. Los pasiyos del insti enllenáronse de misteriu gracies a los cartelos realizaos pol alumnáu de Llingua asturiana. Avérate a descubrilos y contemplar estes grandes obres d’arte inspiraes na nuestra tradición celta. 

TRABAYANDO COL ALFABETU (26-27)

Esti cursu, Eneko, Asur, John, Carmen, Martín, Liri, Gala, Álvaro, Izan, Ari y Vera,  los escolinos y escolines de primeru d'ESO, echaron a pacer la so maxinación y crearon estes coses tan guapes pa trabayar l'alfabetu. 

¡Nun puen ser más guapes!

MAÑANA NOS BOLOS (25-26)

El pasáu 27 de mayu, l’alumnáu de 1u y 2u d’ESO acercóse a la bolera municipal El Caudal pa que Pepín de los Valles, un paisanín d’ochenta años, apasionáu d’esti xuegu asturianu hasta más nun poder y que sabe más que les curuxes, mos deprendiera a xugar a la cuatriada.

Primero diomos unes llecciones teóriques básiques y dempués toos y toes practiquemos tirando la bola a ver si valtábemos el biche.

El “ganador” llevó pa casa un llaverín perguapu como recuerdu.

¿Lo que más-yos prestó? Él, Pepín. 

¿Lo que menos? Que namás duró dos horines.

A ver si se pue repetir pal añu que vien.

MAÑANA EN DANZA (25-26)

La Conceyalía de Normalización Llingüística del Ayuntamientu de Mieres, buscando fomentar los bailles tradiciones y la cultura llocal nos centros educativos, ufiertónos l’actividá (enmarcada na Guía d’Actividaes y Recursos Educativos) Mañana en danza. Poro, los díes 5 y 11 de febreru, los grupos de baille Ruxidera y Prau Llerón, tuvieron nel insti pa deprender al alumnáu de primeru y segundu d’ESO de Llingua asturiana, los pasos básicos de les nuestres dances: el picáu, el pasu corríu (per delantre y per detrás), el pasu xota y taconeos o pasu atrás, ente otros…

LOS XUEVES DE XINERU DE LA XUNTA (25-26)

Esti xueves pasáu, 29 de xineru y l’anterior, 22 de xineru, l’alumnáu de Llingua asturiana y Lliteratura del IES conoció la Xunta Xeneral del Principáu al traviés d’una visita guida na nuesa llingua materna.

Tres inspeicionar les sales más guapes ya importantes del edificiu, conocer curiosidaes sobre historia, sobre los cuadros qu’engalanen les parés, sobre la bandera y sentanos nel hemiciclu nos mesmos sitios onde los políticos diciden qué tenemos de facer tolos asturianos y toles asturianes, dimos una vueltuca pela plaza la catedral y alredores p’acabar visitando a Mafalda enantes de tornar pa casa.

Una mañana aprovechada de les que presten porque, amás, el tiempu acompañó con solín y calorín.

TRABAYANDO COL ALFABETU (25-26)

Jazmín, Aya, Omar, Diego, Izan, Marina, Llucía, Ana, Valeria, Liri, Caye y Xuan, l'alumnáu de Primeru d'ESO, fizo esti trabayu tan guapu col alfabetu. 

¡Nun hai manera más guapa de deprender!

¡Sois unos artistes!

 

RUTA L' ALBA (24-25)

El pasáu llunes 26 de mayu, l'alumnáu de primeru y terceru d'ESO foi facer la ruta l'Alba, un monumentu natural qu'entama nel llavaderu del perguapu pueblu de Soto d'Agues, y qu'avanza siete quilómetros pallá. Ente horros, paneres, cases de corredor, llavaderos, ablanos, carbayos y llimiagos a fartar, esfrutamos d'un día nel que'l sol nun molestó y l'orbayu nin llegó al suelu. Pal añu que vien, más.

MEMES (24-25)

L'alumnáu de 4u ESO tuvo de facer unos memes con amigos falsos ente'l castellán y l'asturianu. 

Equí podéis ver dalgunos de los meyores:

DÍA DEL LLIBRU (24-25)

Pa trabayar el día del llibru, l'alumnáu de Primeru d'ESO tuvo creando les sos propies noveles. 

Pa ello, se-yos apurrió un molde d'un llibru que tuvieron qu'inventar: per un llau la portada y pel otru'l resumen. 

Dalgunos de los resultaos son estos:

DESCUBRI L'ANIMAL. GENIALLY (24-25)

L'alumnáu de segundu de Bachilleratur ellaboró esti prestosu Genially sobre animales d'Asturies col que podéis xugar equí a aldovinalos:

Xuega equí

DESCUBRI'L PERSONAXE. GENIALLY (24-25)

L'alumnáu de segundu de Bachilleratur ellaboró esti prestosu Genially sobre un personaxe asturianu perconocíu col que podéis xugar equí a aldovinalu:

Xuega equí

DÍA DE LA POESÍA (24-25)

 

Pal día la poesía ficimos una actividá perguapa: cada alumnu y cada alumna tenía qu'escoyer una poesía d'ente toles ufiertaes, escibila nun foliu y adornala col dibuxu que quixere. Dempués, fuimos repartiéndoles peles aules pa que l'alumnáu escoyera una al debalu y quedare con ella. 

Ficímosla en castellanu y n'asturianu y el resultáu foi perprestosísimu.